مشاعر جديدة ..

أول يوم شغل حسيت احساس جديد جدًا..
مع انى كل يوم بركب مواصلات.. وكل يوم بصحى بدرى عشان الكلية
لكن وانا نازلة رايحة الشغل حسيت بمسئولية .. وانى هعمل حاجة قدام مقابل مادى .. ولو روحت متأخرة ربع ساعة هيبقى فيه خصم يوم ..

يعنى حسيت انها حاجة جد أوى .. أول مرة اعيشها.. ولسة مستنية اليوم اللى هقبض فيه .. مش عشان الفلوس على اد ما انا مستنية اجرب الشعور لآخره ..
____

احساس جديد برضو حسيته النهاردة ..
انا واخويا الصغير بس فى البيت عشان ماما سافرت ..
واخويا نايم.. وانا ما فطرتش ولازم اتصرف..
المعطيات :
20 جنيه لزوم الفطار والغدا..
**
جبت ورقة وقلم وقعدت اكتب الحاجات اللى هشتريها .. كنت بفكر اعمل مكرونة وخلاص.. بس كان نفسى احس انى مسئولة عن بيت وبعمل حاجة بجد مفيدة .. فقولت اعمل خضار جنب الرز ..
**
المطلوب:
- 2 جنيه عيش
- 2 جنيه طعمية
- 1 شيبسى "لزوم الطفاسة"
- كيس رز
- كيس بسلة مجمدة "لزوم الراحة" : )
- علبتين تونة "عشان العشا"
-فكرت أجيب ازازة فيروز .. بس قولت لأ مش هفك الخمسين زي ما قولت لماما .. وهلتزم بالفلوس اللى معايا .. فجيبت بجنيه ليمون .. وهعمل شفشق ليمون ساقع : )
**
البرهان :
نزلت .. وجبت الحاجات .. والفلوس قضت الحمد لله وبزيادة كمان ..
وفطرت .. وهقوم كمان شوية اعمل الغدا..


هو الحمد لله بنزل اجيب لماما الأكل اللى هتعمله.. مش أول مرة يعنى..
بس أول مرة احس ان انا المسئولة عن القرار وعن الميزانية بتاعة اليوم ..

وانى لازم اجيب حاجة تتاكل بجد مش زي كل مرة بترسى على اندومى وشيبسى : )


جميل ان الواحد يجرب يحس بحاجات جديدة ويعمل تغيير فى حياته..
مع انها حاجات بسيطة بس بتفرق بجد ,,