ابتسم .. أنت فى الاسماعيلية

أنا كنت فى الاسماعلية النهاردة !!
انا نفسى مش مصدقة ,,

اللى فاكراه انى نمت 5 الفجر وصحونى بعدها بساعتين بيقولولى العربية وصلت!
شيلت الشنط وحطيناها فى العربية وسلمت على خالتى واخر العنقود اسلام .. وقعدت وانا مزهولة لسة..
الطريق كان فاااضي جدًا وبررررد جداا
وهدوووء جداا

طريق يشجع على النوم لكن رغم كدة ورغم انى ما نمتش غير ساعتين
الا انى كنت قاعدة بملى عينى ..
كنت فعلا سعيدة ..

وسبحان الله وصلنا فى ساعة ونص !
انا بروح كليتى فى ساعتين أحيانًا ..!!

نزلنا الشنط وطلعت انا واسلام السلمتين بتوع العمارة ولقيته بيقول لى جهزى نفسك بقى عشان هنطلع كتير
قولت له ايه .. مش قادرة !! وباخد نفسى ..
لقيته بيخبط على الباب اللى قدامنا .. !! فى الدور الأول !! :)

سلمت على اختى وبنت خالتى ..
سلمت على اختى كإن بقالى شهر ما شوفتهاش مع ان المدة ما عديتش اسبوع!!

ضحكنا وعيطنا !!
واحنا مروحين كنت انا وامنة وبنت خالتى قاعدين جنب بعض .. وقعدوا يحكوا لى عملوا ايه فى الفترة دى
كنت هموووت من الضحك
وكل شوية نضحك ونعيط
زي المجانين ..
ظروف كانت صعبة اوى اللى مرينا بيها..!
والأغرب..
اننا دلوقتى اصحاب جدًا .. وقرايب جدًا فوق الوصف..

الحمد لله..
شوفوا ربنا أما يريد يألف بين القلوب..
ويصلح ما بينهم..

اما الأوصال تتقطع بـ"كن" وتتصلح بـ"كن"
ببساطة كدة..
أما ربنا يريد يخلينا نفرح جداا

فى وقت كنا حاسين فيه بوحدة وبفراق وبغربة جداا
وسط الأهل
وفى بلدنا.. وفى بيوتنا

فى وقت كنا فاكرين انه خلاص اللى اتكسر عمره ما يتصلح
فى وقت كانت الدموع بتنزل من غير امل فى اننا نتجمع تانى..
فى وقت كان كل واحد فينا متأثر جدًا انه مش هيقدر يشوف التانى رغم اننا فى بلد واحدة !!

حسيت بجد ان اللى فات كان الليل والنهاردة الفجر
وان اللى فات كان الضيق والنهاردة الفرح والفرج

حسيت انى فرحانة أوى ..,

رجعت ونمت .. لحد الساعة واحدة بالليل..
وصحيت دلوقتى بجد لسة مش مستوعبة ..

قدرتك يااا رب ورحمتك ..
قدرتك انك تآلف ما بين القلوب بالتدبير والترتيب دة
ورحمتك انك تفرحها أوى كدة..
واننا بس بنضحك عشان مروّحين مع بعض .. : )

الحمد لله ..