عارف أما تحس الفرح والخوف..!
عارف اما تحس انك شيطان بجناحين ملاك..
عارف لما تحس الدنيا برد وحر
اما تحس انك نشيط كسلان جدًا
نازل الشغل سعيد وحيد ..
نازل وانت على خدك دموع مش عارفة نزلت ليه..؟

عارف اما تكون مبسوط وحد ييجى يقولك فى الشغل ايه الدموع اللى على خدك دى ؟!
فتمسحها وتقول اكيد ارهاق..

عارف اما تحس انك راااضى جدًا لكن مش عارف تعبر بأفعال..!

عارف اما تحس ان الناس كلها حواليك .. ومستأنس بيهم ..
واما يسيبوك تحس انهم واحشينك

عارف الإحساس السلبى اللى بيخليك تشوف اللى ناقصك وتقول ما عنديش
اللى بيخليك ما تشكرش ربنا على نعمه الكتييييير اللى مديهالك ..!

عارف اما ربنا ينزع منك نعمة عشان تحس أد ايه انت كنت ناقمها ومش مديها حقها من المحافظة ولا مدّى حق ربنا فى الحمد مع انك انت اللى محتاج تحمده عشان يكرمك

عارف اما دايمًا تقول انا بفكر بسلبية .. لازم اخلى افكارى كلها ايجابية ..
وتيجى لحظة ضعف .. وييجى الشيطان ..
فيحسسك انك ولا حاجة !

مع انك كل حاجة ..!
مع انك ربنا أكرمك وفضله عليك كبير جدًا لكن انت اللى مش شايف غير اللى ناقصك
مش عارفة ازاي بنعيش طول عمرنا ميتين لحد ما يجلينا اللى احنا عايزينه فنعيش بيه حبتين لحد ما يموت او نموت ..!!

ما هو لو ربنا هو الغاية والهدف بتاعنا فى الدنيا دي
هنعيش كل يوم وكل لحظة
مش هنبقى متضايقين .. ولا مستنيين ولا نفسنا فى حاجة ..
لإن الرزاق هو اللى معانا دايمًا وحي لا تأخذه سنة ولا نوم !!

مش هنبقى "عايش ومش عايش ومش قادر على بعدك" .. !!
احنا مش عايشين عشان بنى ادم .. سواء كان اخ او اخت او صديق او اي حد عزيز علينا فى الدنيا
احنا عايشين عشان اللى خلق آدم ..
واللى أحياه واماته ..







حاسة انى عايزة انام ..!!