سكة أمل

لسه جوانا احتمال

للاحتمال

لسه بنحب الحقيقه

لسه عاشقين الجمال

لسه يا قلوبنا البريئه

صبرنا فوق المُحال

لسه يا دموعنا بنعرف

للامل سكه وطريق

لسه جوانا البريق

اللى بيه الضلمه ترحل

حتى لو كانت ساعاتنا

لسه فيها شويه ضيق

لسه فيه ايام كتير

فيها تبقى الفرحه اكتر

تكبر الاحلام وشمس الحب تظهر

والشعاع اللى ف عنيها

حقيقى يقدر

يملا كل قلوبنا تانى بالدفا

يفتح الابواب لغنوه

كات ف يوم متكتفه

القى حلمى صار حقيقه

ان زمن الحب يرجع والصفا

محمد سعيد .. سكة أمل