هنا وهنا بس ..

هنا وهنا بس .. عرفت يعني ايه ناس يوحشوك قوي وتبقى نفسك تشوفهم .. وإنت عمرك ما شوفتهم قبل كده فى حياتك ..
لكن كإنك كنت تعرفهم من زماااان .. كإنك كنت معاهم عشرة عمر .. فوحشوك قوي

هنا وهنا بس .. عرفت يعني ايه تعرف ناس كويس جدا وعز المعرفة .. من غير ما تكون شفتهم قبل كده

هنا وهنا بس .. عرفت يعنى ايه ناس يكونوا ليك مقربين قوي مع انك عمرك ما شوفتهم قبل كده

هنا وهنا بس .. عرفت يعني ايه تحس انك بتشوف ناس كل يوم وتعرفهم كويس يمكن اكتر من اهاليهم .. مع انك عمرك ما شوفتهم قبل كده

هنا وهنا بس .. عرفت يعني ايه ممكن تشوف ناس مرة او مرتين .. او كل فين وفين .. لكن كإنك عايش معاهم كل يوم ..

ويوحشوك قوي ..

هنا وهنا بس .. عرفت يعنى ايه ناس ابقى مبشوفهاش اصلا .. ومتعودة على كده وبكلمهم من خلال شاشات بس ..
لكن لما بشوفهم مرة .. بحس بوحشة فظيعة ليهم .. وابقى عايزة اشوفهم كل يوم ..
مع اني .. مكنتش بشوفهم قبل كده خالص ..

وتاني .. هنا .. وهنا بس .. عرفت يعني ايه ناس يوحشوك قوي .. وتبقى حتطير عشان تشوفهم .. وحتطير م الفرح لما تشوفهم .. مع انك مشوفتهمش قبل كده خالص ..

_________-

هنا دي طبعا انتوا عارفين تعود على ايه ..

_______

هنا وهنا بس .. عرفت يعنى ايه أتجرأ واطلب السفر .. واحاول اسخن الناس عشان تطلع رحلة مرة .. واسافر مستقلة مع صديقة مرة .. واسافر لوحدي مرة .. عشان اشوف الناس .. واحضر تجمعهم .. وعرفت يعنى ايه انى احاول اقصر المسافات .. واكررها عشان يبقى السفر حاجة سهلة وممكنة .. قدام .. فأحس ان المسافة قصرت ..

هنا لأول مرة اجرب .. اشوف ايه اقصى حدود المسموح بالنسبالي حتى لو كان رفض الفكرة اقرب .. عشان محرمش نفسي لمجرد اني معرضتش الفكرة .. وعرضت .. والاعتراض كان اقرب لكن ناقشت .. وخد واديت فى الكلام .. وحاولت أقرّب الصورة للذهن .. وعرفت .. أو بفضل الله وعونه وسّعت حدود المسموح ليا ..

احمد الله واشكره .. واتمنى تدوم ..

ربي يحفظني .. ويحفظهم ..

مع اني عمري ما كنت بتكلم معاهم كده .. ولا باخد وأدي فى الكلام .. لني معنديش لغة ..
مبعرفش اشرح نفسي ولا وجهة نظري .. معنديش طريقة تعبير عن نفسي ..
لكن حاولت .. معرفش نزل على الهدوء منين .. ولا الحكمة فى الكلام ..

بجد ربنا الى ساعدني .. انا كإني مش انا الى كنت بتكلم خالص .. دي كانت بجد واحدة تانية