جاهينيات عاجباني ..

أنا كنت شيء وصبحت شيء ثم شيء
شوف ربنا .. قادر علي كل شيء
هز الشجر شواشيه ووشوشني قال:
لابد ما يموت شيء عشان يحيا شيء

يأسك وصبرك بين ايديك .. وانت حر
تيأس ما تيأس .. الحياة راح تمر
انا دقت من ده ومن ده ...عجبي
لقيت الصبر مر .. وبرضك اليأس مر

إنشد يا قلبي غنوتك للجمال
وارقص في صدري من اليمين للشمال
ما هوش بعيد تفضل لبكرة سعيد
ده كل يوم فيه ألف ألف احتمال

يا عندليب متخافش من غنوتك
قول شكوتك واحكى على بلوتك
الغنوة مش حتموتك انما
كتم الغنا هو اللي حيموتك

عجبتني كلمة من كلام الورق
النور شرق من بين حروفها وبرق
حبيت أشيلها فـ قلبي.. قالت حرام
ده أنا كل قلب دخلت فيه إتحرق

كان فيه قمر كإنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام

أعرف عيون هي الجمال والحسن
واعرف عيون تاخد القلوب بالحضن
وعيون مخيفة وقاسية.. وعيون كتير
وبحس فيهم كلهم بالحزن

سمعت نقطة مية جوه المحيط
بتقول لنقطة متنزليش في الغويط
أخاف عليكي من الغرق .. قلت انا
ده الي يخاف من الوعد .. يبقى عبيط

حدوتة عن جعران وعن خنفسا
اتقابلوا حبوا بعض ساعة مسا
ولا حد قال اختشوا عيب حرام
ولا حد قال دي علاقة متدنسة