قالوا الشقيق بيمص دم الشقيق
والناس ماهياش ناس بحق وحقيق
قلبي رميته وجبت غيره حجر
داب الحجر.. ورجعت قلبي رقيق

*الدنيا من غير الربيع ميته
ورقة شجر ضعفانه ومفتفته
*لأ يا جدع غلطان تأمل وشوف
زهر الشتا طالع في عز الشتا

غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون .. و ليه
رسمت وردة وبيت و قلب و علم

بحر الحياه مليان بغرقي الحياة
صرخت خش الموج في حلقي ملاه
قارب نجاة!.. صرخت قالوا مفيش
غير بس هو الحب قارب نجاة

دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات أكتر بترفض تموت

أنا اللي بالأمر المحال اغتوي
شفت القمر نطيت لفوق في الهوا
طلته ما طلتوش إيه انا يهمني
و ليه .. ما دام بالنشوة قلبي ارتوي

حاسب من الاحزان و حاسب لها
حاسب علي رقابيك من حبلها
راح تنتهي و لابد راح تنتهي
مش انتهت أحزان من قبلها؟