يوم قلت آه.. سمعوني قالوا فسد
ده كان جدع قلبه حديد واتحسد
رديت علي اللايمين أنا وقلت
آه.. لو تعرفوا معني زئير الأسد

يا حزين يا قمقم تحت بحر الضياع
حزين انا زيك وايه مستطاع
الحزن ما بقالهوش جلال ياجدع
الحزن زي البرد.. زي الصداع

في يوم صحيت شاعر براحة وصفا
الهم زال والحزن راح واختفي
خدني العجب وسألت روحي سؤال
أنا مت؟.. والا وصلت للفلسفة؟

لا تجبر الانسان و لا تخيره
يكفيه ما فيه من عقل بيحيره
اللي النهارده بيطلبه و يشتهيه
هو اللي بكره حـ يشتهي يغيره

أنا كل يوم أسمع.. فلان عذبوه
أسرح في بغداد والجزاير واتوه
ما اعجبش م اللي يطيق بجسمه العذاب
واعجب من اللي يطيق يعذب أخوه

إقلع غماك يا تور وارفض تلف
إكسر تروس الساقية واشتم وتف
قال: بس خطوة كمان.. وخطوة كمان..
يا اوصل نهاية السكة يا البير يجف

سهير ليالي و ياما لفيت وطفت
و فـ ليلة راجع في الضلام قمت شفت
الخوف.. كأنه كلب سد الطريق
وكنت عاوز أقتله.. بس خفت

ياطير ياعالي في السما طظ فيك
ماتفتكرشي ربنا مصطفيك
برضك بتاكل دود وللطين تعود
تمص فيه ياحلو.. ويمص فيك