عند مقام الحسين

الحسين اقصد طبعا المقام ده لو هو مقام فعلا ..
الجو الروحانى الرائع
الناس الغلابة اللى بيضحكوا وبيكلموا السائحين او السواح فى اقوال اخرى
حتى لو شفت واحد بيبيع شيشه لواحد المانى
والامانى ده بيضحك ضحكة هتلرية قاسيه من ركاكة اسلوب البياع ومدى سوء تحدثه بالامانى
يمكن انا حاولت اقف واوضح للبياع ان الراجل مش بيشرب اصلا سجاير ومش مهتم وبشرح لواحده تانيه وبحلف لها بالله ان تمن الطعميه مش 20 جنيه للقطعه الواحده
لكن هنعمل ايه بلدنا
ام هند "المهم يعنى "
خان الخليلى
وقهوة الفيشاوى
والشباب اللى بتضحك من قلبها بجد
بحب اللمه وبحب الناس
خصوصا اللى من هناك
جدتى حكت لى ازاى عاشوا فى الحسين
مع انها مغربيه
بس خلاص مصر بهتت عليها
عارفه كل حوارى الحسين
وقالت لى ان "نجيب افندى محفوظ "كان جارهم
ما صدقتش غير لما حكت لى بجد عن الشخصيات اللى كتب عنها "نجيب" افندى وانها تعرفهم واحد واحد
وتعرف ناس كتير "نجيب" ما كتبش عنهم زى مثلا اليهودى من حارة اليهود اللى كان طيب قوى
ما كانش زمان في فرق بين المصريين .....
الابواب وياما وقفت عند باب الفتوح وباب النصر بوابات القاهرة القديمه اللى هى قاهرة المعز لدين الله
ولما واحد ينادى عليا يقولى بالتركى كلام مش فاهماه
اقوله مش هشترى برضه انا مصرية يقولى ما انا عارف انك مصرية يعنى بس بجر رجلك علشان تفتكرى نفسك امورة وتركيه وتيجى تشترى..
وبعدهالكم يا شباب الخان
سيبونى فى حالى
بعدى على محلات العطارة بحب اشم ريحة القرفة وريحة الياسمين المتعتق
المحل يعنى بتاع قرايبنا
زى ما تقولوا استغلال
بروح وباخد من كل حاجه حبه فى ايدى
احلى حاجه الياسمين المتعتق ريحته زى ريحة الامل او يمكن الخداع مش عارفه بس هو جميل حتى لو كان الخداع مش مستحب عندنا بس بيترجم عندى دايما لحاجه
اصلى كلام فى سركم بسحر بالحاجات ده
حتى لو فعلا السحر مش شغال معايا وانى حتى فى السحر فاشله

جزء من تدوينة لأختى الحبيبة : أمينة عفيفى
ونقلتها فى قلوب صديقة عندى فى المدونة