كيمو والقملة

كنت من فترة اضطريت افضي دولاب الكتب عندي عشان يتنقل من مكانه ورجعت رصيته تاني ..

فلقيت عندي حاجات قديمة من قديم الازل كده .. ذكريات بقى ..

واتاريني كان لي كراسات خحواطر وانا مكنتش واخدة بالي .. ( واضح اني ببوح من زمان )

ام هند وسط الحاجات لقيت ورق من كراسة مقطعاه .. من ايام ثانوية عامة ( يعنى من ايام الهكسوس تقريبا )

انا وصاحبتي كنا قاعدين سوا فى حصة وبنألف قصة عن طريق ان كل واحدة فينا بتكتب جملة بعد التانية ..

وألفنا قصة سميناها كيمو والقملة ( الايمو الى باصص فى الارض زهقان ده )
وإليكم القصة ( نفسا لايمو السابق )

كيمو والقملة

كان من قديم الزمان يعيش في بلاد الواك واك طفيل صغير جميل عنده شعرتين إسمه " كيمو"
وكانوا الشعرتين ساعة يروحوا وساعة يجوا ، وكان كيمو بيتضايق من كده ، وراح لطبيب الدولة لكن الطبيب معرفش يحل مشكلته وإحتار الأطبة في حالته..
وكان فيه قملة غلسة دايما تيجي تبات في شعره.. ويقولها إمشي يا قملة يا مفعوسة ا تباتيش .. ليسيد أهو جالك حيفشفشك فشافيش..
تقوم القملة تقوله: يا عبيط .. مش كفاية إن لمّا الشعرتين بيروحوا مابعرفش أبات فين ..
يرد يقولها: روحي ما تروحي ملكيش دعوة بي .. بتباتي ليه عليا .. من إمتى شعري حبيبك.. وبتلزقي ليه عليا .. ياللي بتلزقي عليا .. مالكيش دعوة بيا .. بتلزقي ليه .. بتلزقي ليه ..ليه ليه .. عليا ..
تروح القملة مطلّعة لسانها له وقايلاله : هسهرك واشغل بالك .. ححيرك وبقولهالك .. وجرب نار اللدغة ..
فكيمو يزعل .. وتقوله : روحي ..روحي في محبوبي .. نارا لهوى فيا .. الشعر مكتوبي .. واللزقة مش بايديا ..
يقوم كيمو مصمم على موقفه .. ويروح يستحمى ويغسل الشعرتين بالشامبو .. وتقع القملة من شعره وتغرق في الشامبو ..
لكن بتعيش وتطفو على سطح فقاعة شامبو وتيجي اختها اللى في راس أم كيمو وتعملها تنفس صناعي .. وتقدر تعلو وترتفع .. وتنزل نزول آمن على راس كريم .. وتقوله :
قاله علينا ديابة ..واحنا يا ناس غلابة ..يا مغناواتي غني حكايتنا ع الربابة ..
انا في راس كيمو ساكنة ومستحملة ريحته المعفنة وكمان مش عاجبه .. عايز يزحلقني ..
قالوا علينا ديابة واحنا يا ناس غلابة ..

____
انا كتبت الكلام الى باللون ده ..
و هند زميلتي الى كتبتك الكلام الى باللون ده..

_____

أي حد عايز يحدف بطوب بمعرفش ايه .. يدي إنذار الاول .. عشان اتفاداها
اللى بيقولوا دمك يلطش ورا هناك ..سامعاهم .. عيب الغيبة دي .. وبعدين انا كنت لسة فى ثانوية عامة وناشئة يا دوب

احم .. حد عايز يشيلنى م المدونة ؟؟

دي كانت فقرة دمعة الصباح .. وإزاي تشل زمايلك فى نفس المدونة ..
الي اللقاء في فقرات اخرى ..

احنا كنا في حصة تانية ألفنا شعر هابوللى شبه ده .. لو حد عايز انا معنديش مانع
ههههههههههههههه

انا حشرفكم :واه يابوي